15 cm. í viðbót

Það bættust um 15 cm. við snjóalögin í gærkveldi og ekki er séð fyrir endann á þessari ofankomu enn sem komið er. Ég fór út og mokaði bílastæðið fyrir svefninn og þurfti svo að fara aftur út að moka í morgun. Veðurfræðingurinn á Global stöðinni í Toronto er með kátari mönnum þessa dagana og hefur endalaust gaman af að tala um hve mörg met hafa verið slegin hér varðandi snjóalög nú í vetur. Í fréttum keppast menn við að sýna snjóinn og ófærðina og mikið er gert úr þessu öllu.

Í gær voru menn varaðir við að skilja snjóblásarana sína eftir úti því þeim er umsvifalaust stolið og seldir í undirheimum Toronto. Þetta eru eftirsóttustu tækin núna og löngu uppseld í öllum búðum. Við látum okkur duga skófluna enn sem komið er en fáum lánaðan blásara nágrannans stöku sinnum.

Hugrún er búin að taka á leigu hús á Myrtle Beach í Suður Karolínufylki í mars. Þá er frí hjá strákunum í skólanum og við ætlum að nota nokkra daga til að fara í sól og sumar þangað. Reiknum með að vorið verði komið hér í Kanada þegar við komum til baka.

Athugasemdir

[Herdís Jónsdóttir (IP-tala skráð) 16.2.2008 kl. 15:58]

Sæl fjölskylda!

Bestu kveðjur frá Eyrinni á Akureyri, þar sem snjórinn kemur og fer og hitastigið er í annaðhvort sumarhiti eða horkufrost.

kveðja Dísa